DJI 近月动作频频，寻晚（9 月 25 日）又有航拍发烧友期待已久嘅 Mini 4 Pro，作为 249g 或以下嘅无人机仔，必定系最多人留意嘅，而且早於个多月前已有片流出，《PCM》编辑部亦极速搵到一部实机开箱，睇睇 Mini 4 Pro 嘅真机系点嘅。
DJI 响 7 月出完双镜嘅 Air 3 无人机，8 月又有 Osmo Action 4 运动相机，9 月尾就有呢部 Mini 4 Pro 无人机仔，今次开箱嘅呢部 Mini 4 Pro 系净机版本，从外观睇落同 Mini 3 Pro 分别唔大，由於同样系 249g 重量，所以机身都系咁轻，不过包装就改良咗好多，例如镜头盖连前避障镜头都冚埋，而且更容易安装，加上跟咗束浆带，毋须另买，有足够保护之余亦方便收纳携带。
Mini 4 Pro 其中一大强项，就系有全面嘅避障功能，除咗云台主镜头上方有两个鱼眼镜头作为前避障用途外，更於两个前避障镜头後面，加入两个後避障嘅鱼眼镜头，达至全向双目视觉系统，换句话说，配合 APAS 5.0 及 5 级抗风嘅 Mini 4 Pro 能够做到接近 360° 嘅避障范围，飞行时就更安心，以 249g 嘅无人机仔嚟讲，能够有大机先有嘅全面避障功能，呢点实在吸引。
另外，以往通常只有大机先有嘅机底 LED 补光灯，今次亦下放至 Mini 4 Pro，呢粒 LED 嘅好处，就系当处於室内或较昏暗环境飞行时，着咗机底粒 LED 就更容易知道无人机嘅飞行位置，同埋降落时又能更准确确认停机位置，以免有所差池而令无人机受损。
至於云台主镜头跟上一代一样，同埋用上一粒 1/1.3” CMOS 感光元件，且可竪拍，细心留意会发现主镜头顶部加入散热位，有助散热；另影片支援 4K/60fps HDR 及 4K/100fps 慢动作摄录，色彩格式更支援 10bit D-Log M 及 HLG，可以话系提供咗接近大机嘅摄录及後制功能。
电池及遥控方面，Mini 4 Pro 电池嘅外型同上代一样，但容量就有啲唔同，Mini 4 Pro 嘅电池有较大嘅 2,590mAh，比 Mini 3 Pro嘅 2,453mAh 多少少；而遥控方面，Mini 4 Pro 嘅屏幕遥控系同 Air 3 一款嘅 RC2，由於天线由一发两收升级至两发四收，而且可手动调整角度，加上 OcuSync 4 技术，图传更稳定，距离更远达 20km，抗干扰能力也更强。
Mini 3 Pro vs 4 Pro
编辑部亦搵嚟上一代嘅 Mini 3 Pro 同新机作机身比较，睇睇两者分别。
小结
售价方面，Mini 4 Pro 普通控遥版售 HK$5,299，跟 RC2 屏幕遥控售 HK$6,599，畅飞套装跟 RC2 屏幕遥控售 HK$7,699，长续航畅飞套装跟 RC2 屏幕遥控售 HK$8,139，呢个价钱相对 Mini 3 Pro 嘅开售价系平咗嘅，加上有更全面、拍得住大机嘅功能，未买上一代嘅话，Mini 4 Pro 系几吸引嘅，至於实际飞行嘅测试，日後有机会再同大家响度分享。最後，响度多谢 UAVHK 创会人、航拍达人 Lock Sir 协助开箱。
查询：天祥摄影器材
电话：2722 1265
